سمسم هيدون يا جدعان

الأول عايز أقول للجميع كل سنة و انتم طيبين و يعود عليكم رمضان القادم و أنتم في خير و سعادة

ثانياً عايز أقول إني فرحان برمضان السنة دي أكتر من أي سنة قبل كده ، لأسباب كتير و خير كتير

ثالثاً عايز أطمنكم على أخونا علاء عصام جبة في كلمات سريعة كده تحت عنوان :

فبذلك فليفرحوا

أخونا علاء قضى قبل رمضان بيومين ، و كان ينوي في رمضان خيراً كثيراً فنحسب أن الله بلغه إياه

إن فيه إخوان لنا كتير قالوا إنهم - كل واحد فيهم - هيختم القرآن في رمضان مرتين مرة لنفسه و مرة لعلاء الله يرحمه

و فيه إخوان له بيهدوا له ثواب صلاة القيام بتاعتهم هذا العام

و إن إخوانه بيدعوا له يومياً على الإفطار

كل ده من فضل ربنا على علاء - الله يرحمه - و بسبب اختيار علاء لصحبة صالحة فنفعته في الدنيا و تنفعه في الآخرة إن شاء الله

و ده كان فيديو علشان نفتكر علاء دايماً من مدونة عمر الجارحي ( أيام من حياتي )0

http://www.4shared.com/file/24108556/7ba7c9ca/___.html

رابعاً : يسرني و يؤسفني و يفرحني و ينكد عليا في نفس الوقت ، إني أذيع على حضراتكم هذا النبأ السار المؤلم السعيد الحزين

سمسم ، صاحبي الأنتيخ ، قرر يدون ، و مش بس كده ، لأ ، دا قرر يدون معايا في المدونة دي غصب و اقتدار و عافية و فتونة ، و أنا مسلم أمري لله ، و ربنا يستر و يجيب العواقب سليمة

و كالعادة في هذه الحالات لازم نكتب الأكلاشيه الشهير

المدونة غير مسئولة عن رأي الناس اللي بتكتب فيها ، و صاحب المدونة غير مسئول عن أفكار صاحبه

سمسم صاحبي الأنتيخ من فترة كبيرة ، من ساعة ما دخل الجامعة ، يعني بعد ما أنا دخلت الجامعة بسنة ، و على الرغم من إن أنا و سمسم أصحاب من أيام ما كنا عيال صغيرين خالص و كنا بنلعب مع بعض و احنا صغيرين ، إلا إننا أنتمنا لما دخل هو الجامعة

أنا و سمسم متفقين في حاجات كتير ، و مع ذلك باحس إننا بنختلف أكتر ما بنتفق ، و سعداء ببعض جداً و مع ذلك باحس إننا بنخنق على بعض أكتر ما بنفرح بعض ، هي علاقة غريبة عجيبة مريبة بصراحة ، لكن اللي حقيقي احنا الاتنين عارفينه ، إن كل واحد فينا هو صوت الضمير للتاني ، بس صوت الضمير اللي مش بيحب يسمعه ههههههههههههههههه

أكيد سمسم هيكون إضافة قوية للمدونة ، و بالرغم من إننا ممكن نختلف في الآراء و الرؤى ، إلا إننا لازم بنحترم بعض ، و بنتعلم من بعض و ربنا يستر و مانكسرش دماغ بعض ، و اسيبكم مع سمسم و مقالاته اللي هيتحف بيها المدونة

أنا معاكم في انتظاره